محترم شیخ الوظائف صاحب السلام علیکم!عبقری رسالہ سے دیکھ کر بہت سے طبی ٹوٹکے آزمائے اور ان سے نفع پایا۔آج اپنے دو مجرب ٹوٹکے عبقری قارئین کی خدمت میں پیش کر رہا ہوں‘ان شاءاللہ جو بھی آزمائے گا میری طرح نفع پائے گا۔
جسمانی امراض میں مفید
گٹھیا ایک ایسی مہلک بیماری ہے جس میں ہمارا مدافعتی نظام ہی ہاتھوں کی انگلیوں، کلائی اور گھٹنوں اور دیگر جوڑوں کو نقصان پہچانے لگتا ہے جس سے ان میں انفیکشن کا عمل شروع ہو جاتا ہے جو درد، اکڑاہٹ اور سوزش کا باعث بنتا ہے۔آہستہ آہستہ یہ مرض شدت اختیار کر جاتا ہےاگر اس مرض کی طرف پوری توجہ نہ دی جائے تو مستقل طور پر بھی اس بیماری کا سامنا کرنا پڑتا ہے۔ایسی صورت میں اس مرض سے جلد چھٹکارا پانا کافی مشکل ہوتا ہے۔اس بیماری سے نجات کے لئے نہایت مجرب ٹوٹکہ پیش خدمت ہے۔حسب ضرورت دار چینی لیں اور پیس کر محفوظ کر لیں۔جو شخص گٹھیاکے مرض میں مبتلا ہو روزانہ صبح و شام ایک گلاس نیم گرم پانی میں دو چمچ شہد اور ایک چھوٹاچمچ سفوف دار چینی ملا کر نوش فرمائیں۔یہ نسخہ باقاعدگی کے ساتھ کچھ عرصہ استعمال کر لیں‘ان شاءاللہ جلد شفاء نصیب ہو گی۔اس کے علاوہ اگر جسم کے کسی حصہ میں خارش اور اس وجہ سے درد ہو تو ایک حصہ شہد‘ دو حصے نیم گرم پانی مکس کر یں اور اس میں ایک چھوٹا چمچ دار چینی کے سفوف کا ملا کر پیسٹ بنا کر تیار کر لیں۔جسم کے جس حصہ میں خارش ہو تو اس صورت میں اس پیسٹ کی متاثرہ جگہ پر چند منٹ اچھی طرح مالش کر لیں‘ان شاءاللہ چند منٹ میں سکون مل جائےگا‘خارش اور درد ختم ہو جائے گی۔
ایسے افراد جن کے بال کمزور ہوکر ٹوٹ رہے ہوں یا گنجے پن کا شکار ہو چکے ہوںتو انہیں چاہیے کہ زیتون کا نیم گرم تیل‘شہد اور دار چینی کا سفوف ایک ایک چمچ آپس میں مکس کر کے پیسٹ بنا کر بالوں پر لگا لیں اور پندرہ منٹ بعد بالوں کواچھی طرح دھو لیں‘ان شاءاللہ بال مضبوط ہو جائیں گے۔